19. maí 2003:

Mögnuð kvöldferð í Laugafell

Sumir menn eru einfaldlega þrjóskari en aðrir og neita að viðurkenna að veturinn sé búinn. Síðastliðin föstudag fóru fimm garpar á sleðum frá skíðasvæðinu í Hlíðarfjalli og inn í Laugafell. Gekk ferðin að óskum en væntanlega er þetta með síðustu ferðum inn á hálendið á þessu vori.

Lagt var af stað kl. 5 en hægt var að komast á snjó í gilinu sunnan við gönguhúsið í Hlíðarfjalli. Þaðan var greið leið upp á topp Hlíðarfjalls, a.m.k. fyrir þá sem höfðu belti og hestöfl til að takast á við færið en það var mjög blautt eftir hlýindi dagsins. Þurftu sumir smá hjálp síðustu brekkuna. Af Hlíðarfalli var ekin hefðbundin leið niður í Glerárdal, fram af Þröminni niður í Skjóldal og upp úr honum áleiðis inn á Nýjabæjarfjall. Þar er enn nægur snjór og frábært færi. Þegar nálgaðist Laugafell minnkaði snjórinn ört og kostaði talsverðar þræðingar að finna færa leið. Í Laugafelli var allt í góðu standi og gæsavarp hafið. Þar hafði þá enginn komið síðan 18. apríl sem segir sína sögu um ástandið í vetur. Eftir bað, kaffi og smásögur var tankað og ekin sama leið til baka. Lagt var af stað úr Laugafelli um kl. 11 og tók ferðin til baka um þrjá og hálfan tíma. Gekk hún áfallalítið en þó náði síðuhöfundur að verða bensínlaus á versta stað, í bröttu gili upp úr Heimari-Lambárdal. Allt reddaðist það þó og án efa hafa menn verið fegnir að skríða í rúmið er heim kom, ánægðir með frábæra ferð.

Í ferðina fóru Hreiðar í Vín, Smári Sig., Jón Björns., Eiríkur Jónsson og Halldór A. Meðfylgjandi myndir tóku Eiríkur, Smári og Halldór. Smellið á þær til að sjá stærri útgáfu.

Útsýnið úr Hlíðarfjalli.	Brottför undirbúin.	Allt að verða klárt.	Hlíðarfjall.
Smári í smá klettabrölti á Jammanum.	Svo sem ekkert sérstakar aðstæður.	Tekur sig líka vel út séð að ofan.	Komnir upp úr Skjóldal og allir vegir færir.
Eyfirskir fjallasalir.	Komnir upp úr Vaskárdal á leið inn á Nýjabæjarfjall.	Þrír kappar. Eiríkur, Halldór og Hreiðar.	Kvöldmatur sunnan við Bergland.
Kvöldmatur.	Og enn verið að borða kvöldmat.	Á Nýjabæjarfjalli.	Skuggar kvöldsólarinnar eru langir.
Þegar nær dró Laugafelli minnkaði snjórinn...	...þar til hann þraut loks alveg.	Lengra verður ekki komist á sleða...	...þannig að síðustu metrana varð að leggja land undir fót.
Laugarferð undirbúin.	Slappað af í lauginni.	Halldór og Hreiðar spóka sig léttklæddir að loknu baðinu...	...en höfðu sig þó í fötin að lokum.
Smári og Jón voru hins vegar sómasamlega klæddir.	Sumarlegt var orðið við laugina í Laugafelli og gæsavarp hafið.	Tankað fyrir heimför.	Við taknkana.
Er leið á nóttina harðnaði færið og þá mátti setja ribburnar undir.	Tunglið að laumast upp fyrir Kerlingu.	Þegar kom fram á brún Hlíðarfjalls blasti Eyjafjörðurinn við fullur af þoku.

 Til baka